....&& ابوي شيخ وانت تفدى نعوله &&....

يالله يامعبـود يـاهـادي الـضـال
ياعالـمٍ بالكـون عرضـه وطولـه

يامهـئ الارزاق عـلام الاجــال
يامنـزل كتابـه وباعـث رسولـه

اطلبك تغفرلـي وتلطـف بالأحـوال
وتجيرني مـن شـر دنيـا ذهولـه

وتزيـل هـمٍ ماهـدا منّـه البـال
يمضي زماني وانهكتنـي حمولـه

الناس في وادي وانا اهيـم فجبـال
بوديان حزنٍ جرفتنـي سيولـه !!

القلب فيـه مـن المعانـاه ولـوال
والعين تبكـي والسعـاده جفولـه!

اخايل الفرحـه ولا شفـت همـال
متى تشوف العين لحظة هطولـه ؟؟

لا ياقصيدي هات لي عـذب وزلال
مـن القوافـي بيـن الٍ واولــه

جزالتك ماناشهـا نقـص واشكـال
ياكيف تنقص (نادره) من تقولـه ؟!

جهزّ سهومك واعيره تشعل اشعـال
واطلق عنان القاف واسرج خيولـه

صوب الذي رجولته كلهـا اقـوال
هي جعجعه من غير تظهر فعوله !!

ياهيه يامخطي المراجـل وياضـال
عن دربها مثلـك تخونـه رجولـه

ترسل سهامك ذاه شاربك ماطال ؟ !
تعجز وانا اسمي فوق لا ماتطوله !

ياناكر المعـروف ياخايـب الفـال
ياواطـيٍ لا ماعرفـت الرجـولـه

المرجله عندك شماغٍ مـع اعقـال
ثوبٍ مفصّل بس يحشـاه زولـه !!

وقفت لك بالعـز والجـاه والمـال
وعلمتك الاكـرام وشهـي اصولـه

شبيت ضوك بعد ماعشـت بـااذلال
واطلقت وجهك ياصغير الحمولـه !

من قيض وقتك صرت لك فيَ وظلال
فرشٍ خضر والكل يرغـب نزولـه

ياما انصحوني قلت ماغيـر عـذال
واهم ماقالـو يخـون بسهولـه !!

رميت كلمتهم علـى يابـس الجـال
واغلقت يمّـك كـل دربٍ سعوولـه

بانت علومك لي قصيرات وطـوال
وستار عِرفك حان موعد سدوله !!

ماهمني قولك وانـا بنـت رجـال
عزي جبل تبطـي عظـم ماتنولـه

ارقا سنودٍ وانـت مافيـك تحتـال !
وعلى القمم كسبت صوله وجولـه

الفخر لي دلـه لهـا العـز فنجـال
وطيب المبادي نلت فيهـا البطولـه

عرضي نزيه وسمعتي فخر الاجيال
وابوي شيخٍ وانت تفداء نعولـه !!

ذكره بياض الوجه لوغـاب فرمـال
ولا انت حيٍ ماوصلـت لوصولـه !

ذكري ينومس كل ذربيـن الافعـال
وتغتاض منّـه كـل كبـدٍ غلولـه

عسى حياتك كلهـا بـاارذل الحـال
وحظك تعيس منوخٍ لـك ذلولـه !!

واشوف عينك تذرف الدمـع همـال
ومن عز نومـك ياعساهـا ملولـه

واشوف بقعا عامله فيـك الاهـوال
والوقت يعلن في حياتـك ميولـه !

وبين المشافي علَك اقفـاي واقبـال
شـرٍ يصيبـك حيرتهـم حلـولـه

والله يحرمك كـل تحقيـق الامـال
وتبقى عيونـك فالزمـان امعلولـه

اكبر خطا صرت اصفق يمين بشمال
درسٍ تعلمته واراجـع فصولـه !!

ظنيت في شخصك تواصيف رجال !
ولاانت لاشٍ جاهلتـك الرجولـه !!

يسلم ذوقك ان شالله

ولاهنتي يارب

صح ألسانكـ

روعـــه بأصاالة وقــــوة كلماتهاا الرائـعـه
سلمت يداكي وعينااكي لاهنتي

يعطيكي الصحه والعاافيه يالغااليه

TiGeR

اكبر خطا صرت اصفق يمين بشمال
درسٍ تعلمته واراجـع فصولـه !!

ظنيت في شخصك تواصيف رجال !
ولاانت لاشٍ جاهلتـك الرجولـه !!


لااااااااااااااااااااااااااا لاااااااااااااااااا صراحة كلمات قوييييييية ومشااااااااااااعر عرفتي توصفينها صح ياحلوة ....

ما في أشين من هذا الشعور ....شعور الخيانة ....
بس للأسف الدنيا علمت اللي ما يتعلم ....

الله لا يوريك مكروه أبد .... وحاولي تتجاوزين هذي العتبة في حياتك الدنيا ما توقف عند رضى رجال .....

..
خخخخخخخخخخ لا يسمعوني التماسيح .....

اطلبك تغفرلـي وتلطـف بالأحـوال
وتجيرني مـن شـر دنيـا ذهولـه

وتزيـل هـمٍ ماهـدا منّـه البـال
يمضي زماني وانهكتنـي حمولـه

الناس في وادي وانا اهيـم فجبـال
بوديان حزنٍ جرفتنـي سيولـه !!


صح السانك ,,,,,,,,,,,,,