لا تنتهد

ياويلك لو تتاخري.. كمليها بسررررررعه

روووووووحووه وماني قايلة >>>> عصبت ...


ترى لو ماكملتيها ببطها هنا ... وبكيفك ؟؟؟

لو سمحتوا قلنا ردود زي كذا ( ننتظر التكملة / متابع / ... ومن هذا النمط مانبغى )
من هذا المنطلق تمنع الردود اللي متابع وننتظر التكملة ...الخ

ناقشوا احداث القصة توقعوا القادم


حــوبــي لــكـــم

ثواني وبنزل لكم جزء

بعد صلاة العصر ..


رجعوا الشباب للمجلس , و دخل عبد المحسن و عبد الملك لوحدة من الغرف و قفلوا على أنفسهم عشان ياخذون قيلولة !


راكان جالس مع فيصل يتفرجون على التلفزيون .. وفجأة قام فيصل ..


+ على وين ؟



- بروح عند الحريم , تلاقي ألحين معهم قهوة و حلى و أنواع السوالف , وإحنا مقابلين هالتلفزيون .


+ آهه طيب أعمل حسابي معك !



- ههههههههه , تؤبرني حبيب ألبي أنا بروح اقعد معهم !



+ و تخليني لحالي !




- والله أنت أمس مخليني لحالي مع عبد المحسن و عبد الملك !




+ يووووه أنا وش جابني ! ليتني قعدت مع الشباب في استراحة حمد !




و طلع جواله .. خليني أدق على مضاوي أشوف وش يسوون داخل !


+ هلا و غلا راكان ..



- هلا بك .. هاه كيف الاستراحة معكم إنشالله مبسوطين !



+ يعني .. إلا أنت وينك هذا خالي فيصل جالس معنا ؟



- أنا بمجلس الرجال ..



+ ليش ما جيت معه ؟ تعال ما فيه أحد غريب .. و أمي نورة تسأل عنك بعد..
تراها زعلت يوم عرفت أنك نمت أمس عند خويــّك !



- وشلون أجي داخل و البنات ؟


+ إمممم مرت خالي فيصل نايمة , و مرام بنت خالتي مشاعل ماسكة ليلى بنت خالتي وسمية تذاكر لها
داخل يعني ما حولك أحد ..




- طيب يالله هذاني جاي ..






/
/







و يروح راكان لقسم الحريم .. و يبدأ بالسلام على جدته أم عبد الله ثم خالاته مشاعل و وسمية
ثم يحب راس أمه و يجلس جنب خاله فيصل و أخته مضاوي ..


وسمية : عاش من شافك يا راكان , وينك فيه مختفي ؟


راكان : والله يا خالتي هالدنيا لاهيتنا ..



أم عبد الله : الله لا يلهينا إلا بطاعته ..


الكل بصوت واحد : آمين ..



مشاعل : هاه يا راكان ما ودك تعرس ؟!


راكان بينه وبين نفسه : " وشفيهم مستلميني على سالفة العرس , أخلص من أمي نورة تجيني أنتي ! شكلك طقيتني بعين يا مراموووه ! "



راكان : والله يا خالتي إن كان عندك عروس دلينا عليها !



أم راكان : والله العروس عندي أنا - و تغمز له –
باركوا لمضاوي بنتي تقدم لها ثامر ولد عمتنا و ملكتهم إنشالله بعد أسبوعين ..


الكل بصوت واحد : مبروووووووك .. الله يوفقها ..




فيصل : هذي الحركة أسميها خيانة يا مضاوي !



مضاوي -وهي مستحية- : وش خيانته ؟



فيصل : وشلون تعرسين قبل مرام بنت مشاعل هذا وهي صديقتك الصدوقة ..


مشاعل ما عجبها الحكي عن بنتها .. بس تبغى تسوي روحها رياضية ..

مشاعل : لا وش خيانته الله يبارك لها و يوفقها , وبنتي مرام ربي يرزقها بالصالح من عباده.



أم عبد الله : إلا هي وراها ما اعرست ما تقدم لكم أحد !



مشاعل : إلا والله يا خالتي يتقدمون لها بس هي تقول توني صغيرة !



أم عبد الله : وش صغيرة عليه ! هذا مضاوي أصغر منها وبتعرس قبلها ولا قالت توني صغيرة .



أم راكان : لا يمه موب عرس ألحين ملكة بس , و العرس قلنا بنخليه السنة الجاية ..



أم عبد الله : أهم شي بنتس جاها رزقها ! بس مرام وش زودها يوم أنها ما تعرس و تعيــّي
على الرجال الكفو !



راكان تضايق مرة من كلامهم , والله أنهم مب صاحيات وش هالحكي ! وحب يغير الموضوع:


راكان : إلا وين ليلى يا خالتي ؟ لا تكون تستحي مني تراي أخوها !



وسمية : لا وش تستحي .. هي داخل مع مرام بنت مشاعل الله يعافيها تذاكر لها إنجليزي
تكفى يا راكان أدع لها شكلها بتعيد السنة والله !



مضاوي : خوذيها كلمة مني يا خالتي و لا تتعبين عمرك , بنتك بتعيد السنة !



أم راكان : وش هالكلام ؟



مضاوي : والله يمه مو اول مرة تعيدها ! هالبنت مب وجه دراسة أبد!
أصلن هي تقول لولا أمي كان من خذت المتوسط جلست بالبيت !



وسمية : مو على كيفها , أهم شي بهالوقت للبنت شهادتها .



أم راكان : لا يا أختي والله بنات هالوقت أهم شي لهم الستر , الوحدة منهم إذا خذت الثانوي وش تبي بالجامعة !
هذي مرام بنت مشاعل يا عمري عليها وش أستفادت !



راكان وصل حده من كلامهم ! في لحظتها جته فكرة جهنمية عشان يغير الجو عند البنات خاصة " مرام "


راكان : إلا عندي فكرة يا خال , وش رايك نسوي خير بالبنات و نوديهم لذاك المكان !



فيصل : أي مكان ؟!


راكان يهمس له في أذنه .. وفيصل يضحك بصوت عالي ..



مضاوي : وين بتاخذونا !



أم راكان : و من قال بتروحون ..



فيصل : إلا بناخذهم و أنتي ما عليك يالله مضاوي روحي نادي البنات من داخل , وشوفي هدى إذا هي بتجي و إلا لا !



مضاوي ما صدقت خبر و راحت ركض تبشر مرام و ليلى ..



فجأة سمعوا الي بالصالة صراخ البنات << = = صراخ الفرح طبعاً


انبسط راكان عالآخر و طلع مع فيصل للسيارة ..









/
/











و طلعت ليلى مع مضاوي و مرام لابسات العباية ..


مشاعل : مرام وين رايحة ؟



مرام : هاه مضاوي تقول أن خالي فيصل بيطلعنا !



مشاعل : مو بس خالك فيصل , راكان معهم .. تعالي أقعدي معنا .



وسمية : خليها تروح توسع صدرها تراه ولد خالتها مو غريب ..




مشاعل : لا يعني لا



مضاوي بإحتجاج : خالتي طيب هذي ليلى بتروح معنا !



مشاعل : ليلى تصيلا أخته من الرضاع ! بعدين لو درا ابوها وش بيسوي ؟




مرام بينها و بين نفسها " إيه حطي العذر على أبوي "


مرام : خلاص روحوا أنتو أصلاً من البداية ما تحمست .




و يطلعون مضاوي و ليلى .. و هم ساكتين و أنقهروا من موقف خالتهم ..



لما ركبوا السيارة جلس راكان يطالع بالمراية .. وأنتبه أن فيه وحدة ناقصة !


راكان : وين ليلى يا مضاوي ؟ لا تكون خالتي ما رضت عشان المذاكرة ترا لاحقة عليها ..




ليلى : آفا عليك ركووون .. يا حبي لأميمتي الله يحللها عند غيرها !



فيصل :أجل وين مرام ؟



ليلى : أمها ما وافقت ؟




راكان بفزع : ليش ؟




مضاوي : مدري عنها تقول مو لازم تروح عشانك أنت الي بتودينا !




راكان -بعصبية-: وأنا وش بسوي لها باكلها ؟



فيصل – حب يخفف التوتر - : وأنتي يا ناكرة الجميل هانت عليك أبلتك تجين وتخلينها؟




ليلى : والله ما دامت أمي سمحت لي بحب يدي وجه و ظهر و بقول الحمدلله ..




راكان - مو عارف كيف يتصرف , اصلن هو مقترح هالمشوار بس عشانها- : فيصل تعال معي نقنعها !




فيصل :أنت وش عليك أم و بنتها لا تتدخل بينهم !




بس راكان ما سمعه لأنه فعلاً نزل و لحقه فيصل .. وراحوا لقسم الحريم ..



راكان : شف لي الطريق .



فيصل يدخل و يشوف ما فيه أحد و ينادي راكان ..

يوم دخلوا قسم الحريم , أستغربوا يوم شافوهم راجعين ..



أم راكان : وشفيكم بسم اله عليكم مو توكم تقولون بتطلعون البنات .



راكان : إلا يمه بس فيه أحد ناقص .




أم راكان : لا يا ولدي تو البنات طالعين بعباياتهم , اجل وين راحوا ما داموا ما ركبوا معكم؟




راكان : لا جوا وركبوا السيارة .




وسمية : أجل وراك تقول فيه أحد ناقص ..




راكان مدري ليه انعقد لسانه ما عرف يفتح الموضوع , وفيصل كالعادة مو هامة شي !


راكان : خالي فيصل جا ينادي حرمته .. وأنا جيت أدور جوالي مدري وين رميته !!




فيصل عرف أن راكان أستحى يفتح الموضوع ..خصوصاُ أن مشاعل عقدت السالفة بسبته ..



فيصل : إيه كنت بروح أشوفها , بعدين وين مرام يا مشاعل ؟




مشاعل : لا مرام مو رايحة معكم .




فيصل : ليه عسى ما شر .



مشاعل : تقول تعبانة شوي .



فيصل و راكان يتبادلون النظرات - فاهمين أنها تصرف -


فيصل : أقول بلا دلع , روحي ناديها يالله , أنت رح للسيارة جوال لاحقين عليه– يأشر على راكان-
و أنا بروح أشوف حرمتي .



مشاعل قامت بملل .. ورجعت لقت أخوها فيصل جاي من عند حرمته ..



مشاعل : تقول مو رايحة ..




فيصل - بضيق - : بسلامتها !




مشاعل : و حرمتك !




فيصل : هاه لقيتها نايمة ما حبيت أزعجها ..



و راح للسيارة و ركب و راكان ينتظر مرام تجي ..



يوم أنتبه فيصل أن راكان ما بعد مشى ..


فيصل : يالله حرك !




راكان : و مرام ؟




فيصل : قلعتها راحت امها تناديها بس تقول أنها هي الي ما تبي تروح !




راكان يطفي محرك السيارة .. مضاوي روحي ناديها ..


فيصل : أنت ما سمعت البنت ما تبي تروح ! أنت وش حارقك ؟ يالله حرك ما يسوى علينا المشوار !




راكان : مضاوي أنزلي ناديها !




مضاوي : طيب !



و تنزل مضاوي .. يوم شافها فيصل تأخرت نزل يستعجل عليهم ..



فيصل من دخل الصالة و هو يصارخ .. مضاوي مرام والله لو ما نزلتوا ألحين ترا بكفر فيكم .. أنزلو و عمى ..



و الحريم ماتوا من الضحك عليه ..


في غرفة البنات ..


+ مراموووه لا تجنيني , بالسيارة راكان و ألحين أنتي !




- قلت لك ماني رايحة !




+ مراموووه أسمعي خالي فيصل يزاعق .. و أنتي تعرفينه ما ينمزح معه !




- مشكلته , أنا متنكدة و واصلة حدي و أنتي تقولين خالي فيصل !




+ شوفي مررووووم أنتي ألحين بتخربين المشوار علينا ! و راكان حالف أننا ما نمشي إلا لما تجين !




*مرام أستغربت .. وش عنده راكان ؟!



- إممم طيب ياالله جيبي عبايتي !




و تنزل مرام و هي تتمخطر مسوية زعلانة .. و تمر من الصالة بدون ما تكلم أمها !


فيصل : أخيراً رضت علينا الليدي مرام !



مرام بدلع : توني أدري غلاي أتاري مشواريكم ما تسوى بدوني ..



مضاوي - تضربها على كتفها - : أقول يالله عن المصالة ترا حامت كبدي ما يسوى
علينا هالمشوار , ذليتونا أنتي وراكانوه !

" أنا و راكان ! "





يتبع

ركبت السيارة بعد مضاوي .. و سكرت الباب بشويش .. وهمست بصوت واطي يرجف ..

الــســلام عليكم ..

الكل ..و عليكم السلام ..

راكان أول مرة يسمع صوتها !!

وش هالنعومة والرقة !! <<== منخدع برجفة صوتها خخخخخخخ


حاول يمسك نفسه قد ما يقدر عشان ما يلتفت .. أبي أشوفها ..

حتى لو كانت بالعباية و ما رح يبين منها إلا عيونها ..

و بدا يحرك السيارة .. و بخاطره " هالبنت أنا من متى ما شفتها أو لمحت خيالها !

من سبع سنين ! لا أكثر .. بس صوتها خيااااال .."





و طلعوا من المزرعة .. بس الجو في السيارة كان متوتر شوي ..


ليلى -تحاول تخفف التوتر - : شغلوا مسجل , عطونا أغاني حلوة !


ويشغل راكان المسجل ..

" الليلة إحساسي غريب .. عاشق و أنا مالي حبيب "



ابتسمت مرام .. حتى هنا كاظم يا راكان !


مضاوي : راكان والي يسلمك شغل راشد ..


راكان : ما عندي أشرطته ..


ليلى الي كانت وراه بالضبط طلعت شريط من شنطتها : طيب خذ شغل هالشريط


راكان : هذا شريط مو أصلي.. !


ليلى : إيه هذا أغاني طق .. فيصل العليان , موضي و هدى الحكمي .. الي تبي !




راكان –يرمي الشريط جنبه- : هذا الي ناقص أشغل طق !




ليلى : يووه المشوار لنا وإلا لك ..



راكان : لي .. بعدين كيفي !هذي سيارتي بشغل الأشرطة الي أبيها !

مرام كانت بعالم ثاني " يووووه ما توقعت صوته كذا ! صوته يشبه عبد الرحمن بن

مساعد ! و ألتفتت تبي تشوفه .. كان شكله من جنب مو واضح مرة ..

أسمر و لابس نظارات شمسية .. أفففف هالشماغ مغطي بعض ملامحه بس مبين خشمه ..

يوووه ودي يلتفت أبغى أشوفه زين .."






/
/






و على يسار الطريق كانت تبين عمارة فيها بقالة ..بدا راكان يهدّي شوي لحد ما وقف


راكان : هالعمارة الله يسلمكم كانت مخبأ للإرهابيين , وعلى فكرة صارت مواجهات بينهم
و بين الضباط .. إذا تلاحظون آثار رصاص من جنب ..



مضاوي وصوتها يرررررجف: راكان والي يسلمك ترا مو ناقصين رعب ..



ليلى : وأنت مصدقته ! قال إرهابيين قال ! مسوي فيها دليل سياحي !



راكان و هو ملتفت .. وش رايك تجين تسوقين بدالي ؟!



و أخيراً جت عينه بعينها .. هي يمكن لحظة بس قدر أخيراً يشوف هيئتها .. مع أنها جالسة .. و مو مبين طولها ..

بس شكل جسمها متوسط الطول , تميل للنحافة بس رويانة شوي !! "




ليلى : إي والله وش رايك بس بدل ذا الخرابيط تودينا لبر وتعلمونا السواقة !



راكان : تشوفين هذا الرجال الي طالع من مدخل العمارة ..



والكل يلتفت حتى فيصل ..



ليلى : إيه وشفيه ؟!




راكان : هذا يراقبونه المباحث , مشتبهين فيه أنه متحالف مع الإرهابيين!



ليلى – بتحدي - : كثر منها !



فيصل : أستحي على وجهك نعنبو بليسك أصغر عيالك هو , تكلمي بأدب ..



راكان : خلها يا خال , نست هي أني أمس كنت مع صديقي حمد و تراه يشتغل بالمباحث
و هو الي قال لي كل هالكلام , و إذا مو مصدقة أكلمه قدامك ألحين ..



فيصل – يفتح الباب-: لا وش تكلمه خلني أنزل أسأله !




البنات صرخوا بصوت واحد: لاااااااااااااااااااا



و يضحك عليهم .. يجي جنب شباك مرام و يأشر لها تفتح الشباك ..


فيصل : وش تبغون من البقالة ؟



ليلى و مضاوي : بيبسي ..


مرام توها بتتكلم إلا فيصل يقاطعها : شاني ..


مضاوي تضحك عليها : فشلتينا ما بقى أحد في العايلة ما درى أنك ما تحبين الشاني !



مرام تطلع راسها من الشباك : إذا ما فيه شاني جب ميرندا فراولة ..



"راكان يبتسم ..شكلها أنطلقت شوي "


و يفر الشريط ..


ليلى : راكان والي يسلمك شغل شريطنا !



راكان : أشرطة طق لا ترانا مو رايحين عرس ! بعدين اسمه شريطي مو شريطنا!


ليلى : لا مو شريطي شريط مرام !


راكان سكت .. و طلع شريط كاظم .. ودخل شريط الطق بدون تعليق !



ليلى : ليتني من أول ما ركبنا قلت أنه مو شريطي!



و أول أغنية طلعت بصوت فيصل العليـّان :" مــن يقول إني لغيرك , أنا لك ماني لغيرك

أنا متعلق مصيري , يا حبيبي في مصيرك "


إلا و بدخلة فيصل للسيارة و يوزع المشروبات ويناول راكان سفن آب و هو يهز طربان ..


فيصل : الله وش هالأغنية السنعة , يسلم بؤك يا ســمــيــيّ ..


مضاوي : إلا يسلم بؤك يا راشد !



ليلى : أنا ناوية أجيبه بعرسي ..



مرام – تهمس لمضاوي - : إلا جيبيه لعرسك أنتي ! ذي من كثرما تعيد أولى ثانوي شكلها بتعنس !



مرام و مضاوي يضحكون ..



ليلى : وش تقولون ..



مضاوي : مالك دخل !سوالف حريم توك صغيرة !



ليلى :لا يتناجى اثنان دون ثالثهما !



مرام : بس إحنا مو ثلاثة إحنا واحد – اثنين – ثلاثة و تأشر على فيصل و راكان قدام
أربعة - خمسة , و تسوي نفسها تأشر جنب ليلى : يووه ستة



مضاوي : من السادس !


مرام : قرينها ..



والكل أنفجر من الضحك .. عدا ليلى الي تحاول توصل لمرام عشان تضربها بس مضاوي
تمسك يدها : هدّي أعصابك يا بنت الحلال .. يووووه شوفي أنكب البيبسي على عبايتك!



و راكان مبسوط عالآخررر من الجو الحلو ..





/
/







مرام بدت تتحسس من الوضع .. فيه شي غريب .. الي يشوف الطريقة الي نتجاهل فيها بعض ألحين ما يصدق كيف درجة الميانة والسواليف على المسنجر , من يصدق !


أنا و راكان !ما انسى أول محادثة بيننا ! كنت أحسبه واحد غريب يستخف دمه..

بس هو ما لعب علي و على طول قال أنه راكان ولد خالتي ..
وما أنسى كيف لما شافني رسمية معاه وما عطيته وجه قالها بصريح العبارة ..
أنا كنت أحس بالفضول و مستغرب أنك أول بنت في العايلة أسمع أنها تدخل نت !
عشان كذا أضفتك .. وإذا الإضافة مزعجتك سوي بلوك و ديليت و أنا بتفهم و ما رح أزعل !



بس أنا أستعبطت وما حذفته , ما أنكر حسيت بالإطراء لما قالي أني ما توقعت في عايلتنا
بنات شخصياتهم قوية و يفرضون حجتهم على الأهل زيك !



بس أنا وشلون تحررت من الحواجز و وصلت معه لهالمرحلة ..
ما انكر بالبداية كنت أسولف سوالف عامة .. عن الدراسة , و الامتحانات ..
ما أنسى أول مرة ساعدني و عطاني مواقع الترجمة ..

من يومها بديت أحس أنه فعلاً انسان طيب و مو ناوي يستهبل ! يستهبل وش هالكلام الهبل مو لواحد بسنه !


الهبل للي بعمر عبد المحسن أخوي ! يعني لو الي أضافني عبد الملك أخوه هل كنت بخليه
يوم واحد بمسنجري ! "





أنتبهت مرام أن السيارة وقفت و التفتت لقتهم بينزلون .. شدت مضاوي من عبايتها ..
مرام : وين نازلين !

ليلى سمعتها -و حبت تحرجها- : بنروح الشانزيلزيه ! أنزلي و أنتي ساكتة أنا اقول
أنه عقلتس موب معتس من شفتس و أنتي تقحنـيـن بهالشاني !



و نزلت هي ما تدري وش السالفة ..




يــتـــبـــع

نزلوا كلهم من السيارة ..


يتقدمهم في المشي فيصل و راكان ..


و الثلاثي المرح يمشون مع بعض وراهم ..


المنطقة كانت شبه مهجورة .. بيوت طين شوية زرع و نبتات بالأرض ..




فجأة يلتفت خالهم فيصل : أنتبهوا لا تدعسون هالنبتة , ترا يقولون الي يدعسها يـمـرح
بالحمّــام وأنتوا بكرامة ..



ليلى : اقول خالي لا يكثر ..


فيصل يلتفت لراكان : شفت قلت لك ما رح يصدقوني ! لكن خلهم لا بغت وحدة منهم
الحمــّام تروح تخشخش بين ذا الشجر و تطلع عليها الكلابة ..





مضاوي تسمرت بمكانها : فـ يـ هـ كــلاب هـــ نــ ا !





يلتفت راكان – و هالمرة قدر يشوف هيئة مرام وهي واقفة ! - : فيه كلاب و قطاوة
و ثعابين و عقارب بعد !





البنات تسمّروا بمكانهم !!




بس مرام تحاول تسوي نفسها قوية .. يمزحون ما عليكم منهم ..




فيصل و راكان كملوا طريقهم ..




مضاوي : يمه المكان يخوف أبي أرجع ..




راكان : لا .. لسه ما شفتوا شي من المكان .. ما يسوى علينا بنزين السيارة ..




ليلى : وش عندكم بهالمكان ..هي أنت وإياه إياني وإياكم تكونون ناوين على بيت الرعب !!





فيصل : لا ارحم منه بشوي ..









/
/










وصلوا منطقة مرتفعة نقدر نقول عنها بداية جبال , بعدوا الشباب عنهم متر



و مضاوي من التعب جلست على طوووول .. و مرام طلعت جوالها تبغى تصور المنظر ..



ليلى : و الله أنك رايقة , مسوية فيها يابانية ..



مرام : مو شغلك ..





و مرام لاهية بالتصوير راكان كان يراقبها وهو يتبسم ..


فيصل كان يكلمه بس هو ماركز معه وفجأة راكان يقاطعه : جهز جوالك !



فيصل : ليه !



راكان : شكل البنات أكتشفوا الهدية ..




فيصل يضحك : إي والله وشلون غاب التصوير عن بالي ..ويطلع جواله..







/
/









فجأة مرام تسمـّرت بمكانها - وبصوت يررررجف - بنات تشوفون الي أنا أشوفه ..




مضاوي قامت مفزوعة : وش تشوفين لا يكون إرهابيين !




مرام تأشر على سور محوط ..




والبنات ألتفتوا للجهة الي هي تأشر عليها ..





ليلى : بنات لا تكون هذي ..







مضاوي تصرخ بهستيريا : مــــــــــقـــــــــبـــــــــــــرة !!







فيصل و راكان غشوا من الضحك .. هم أصلاً جايـبـيـن البنات بالعاني هنا ..


فيصل ما عاد قدر يصور ... و من كثر ما ضحك طاح جواله منه ..



راكان يحاول يلم نفسه .. فيصل قم شفهم لا ألحين تطيح وحدة مغمى عليها ..



فيصل : ههههههههههههههههههههههههههه آآآآآآآآآآآآآآآآآآآآه يا بــطــنــي ههههههههههه
يا ربيه من زمان ما ضحكت كذا ههههههههههههههااااااااااااااااااااااااااي




وفجأة ما دروا إلا بشبشب ليلى يطب عليهم بس ما ضرب أحد فيهم ..


و يقوم راكان لهم .. يوم قرب مضاوي على طول راحت تحضنه وهي تبكي و تصارخ..



مضاوي : راكان الله يخليك رجعني البيت .. راكااااااااااااااان




راكان حس أن مزحتهم ثقيلة.. أول مرة يشوف أخته تبكي كذا !


راكان : يا بنت الحلال أذكري الله ..


ويسكت شوي ..


يوم شافها ما هدت :يالله مشينا للسيارة ..




ويطالع فيصل .. ويأشر له.. تعال يالله مشينا ..




ويجي فيصل و هو للحين يضحك وبيده شبشب ليلى ..



فيصل : آخخخخخ يا بطني والله عليكم أشكال هههههههههههه ..



ليلى : أنتوا ما تستحون جايبينا للمقابر !



فيصل : إحنا رجال يا بنت أوخيتي مخلين الحيا للحريم ..



ليلى : وأنا يوم قالت لي مضاوي أنكم بتودونا مشوار اقول لاااااا الشمس من وين طالعة اليوم!
وش هالرحمة الي نزلت بقلوبكم .. والله أنكم شياطين ..



فيصل : هي هي أنتي بدينا بالغلط .. بعدين وشفيها المقابر تراها نهايتنا و إياكم ..
و الموت حق علينا -ويلتفت لراكان- يالله خذهم للسيارة ..



راكان : و أنت !



فيصل : انا بروح اسلم عليهم و يأشر للمقابر !



ليلى تتحلطم – جعلك ما ترجع –



فيصل : قلتي شي ليلوه !



ليلى : سلامتك , لا تنسى تسلم لنا عليهم .. ترا لولا الحيا كان جبنا قهوتنا وشاهينا
ودخلنا نسلم عليهم ونقهويهم , بس يقولون زيارة النساء للقبور ما تجوز !




فيصل : اقول روحي و أنا خالتس لا يكثر ..








/
/







وصلوا للسيارة و راكان ما زال ماسك يد أخته .. فتحت ليلى الباب و ركبت و ركبت وراها مرام ..


و راكان ماسك يد أخته : لا تزعلين مضاوي والله كنا نمزح !


مضاوي : الله يسامحكم ..



ليلى لما شافت راكان ركب: لا والله بنزعل.. وش هالمزح! مزحكم مثل وجيهكم !



راكان : أنتي مركبة رادار ! اخبر أني كنت أكلم أختي ..



و تضحك مرام لا شعورياً .. و تضحك مضاوي على ضحكها , وراكان يضحك لضحكهم ..



ليلى : قل أعوذ برب الفلق .. ومن شر حاسد إذا حسد .. بسم الله علي وش الي مركبة
رادار إلا صوتك واصل عندي في السيارة ..



راكان يطالعها بالمراية بس هو مركز على الي جنبها: ليتك تركزين في دروسك مثل
ما أنتي مركزة معنا ! إلا بشري وش أخبار الدروس الخصوصية !



ليلى : بسم الله علي و أنت وش دراك أني آخذ دروس خصوصية !




راكان : مضاوي قالت لي ..



* مرام تنهدت تنهيدة قوية .. بس ما انتبه لها إلا راكان !




ليلى : و أنتي بس مشتغلة نمــامة ! ما دام عندك لسان و تعرفين تحكين ليش ما قلتي
لنا إنك بتعرسين !



مرام مسوية متفاجئة : بتعرس !




* و راكان يبتسم , يقالها ما تدري




مضاوي - استحت من كلام ليلى - : ألحين هذي طريقتك في قولة مبروك !




مرام : ألف ألف مبرووووك تستاهلين كل خير , و ربي فرحت لك من كل قلبي !



ليلى : إلا بقول مالت عليتس من صديقة .. لو بغيت أبارك لتس بدعي لنفسي ..
شوفي مراموووه مو تسوين زي ذا الخاينة الي جنبتس , أبيتس أول ما يكلمون
الخطاطيب تعلميني أول بأول ..



مضاوي : ألحين أنتي كنتي تذاكرين مع مرام داخل , و ما سمعتي الخبر مع الحريم ,
و إذا مرام ما تدري أنتي وشلون دريتي !



ليلى : بلاتس ما تدرين يا حبيبتي المعرس داق لي بيجر !



مضاوي : عن الحركات عاد أتكلم من جد كيف عرفتي ؟!



مرام : إي والله يالخاينة متى عرفتي ! و ليش أنا آخر من يعلم !





* ههههههههه قوية , جحدتني ما كأني معلمها !





ليلى تغير الموضوع : الحين وينه هذا ! عسى بس ما نوى يدخل يسلم عليهم قبراً قبراً !




والكل أنفجر من الضحك ..ما عدا مضاوي ..





مضاوي : يا بنت جاوبيني كيف عرفتي !




ليلى : إذا رجعنا المزرعة أقولك .




مرام : إلا ما سألتك مين العريس ؟










مضاوي : إذا رجعنا المزرعة أقولك .




ويركب فيصل السيارة .. و كملوا طريقهم للمزرعة بعد ما بدى الظلام ينزل !


&&&&&&7





رجعت العايلة من المزرعة ..

و الكل صار مشغول بالتحضير لملكة مضاوي ..

مرام و ليلى من جهة .. صاروا يروحون السوق مع بعض .. و أمهاتهم معهم طبعاً .. عشان

إذا رجعوا من السوق يكملون مذاكرة ..ليلى شرت لها أول فستان جاهز اقترحته أمها وسمية..

بس مرام لا ! وسمية خالتها تتـّريق عليها : الله يعين أمك إذا جا جهازك !

مشاعل : تعالي شوفي هالفستان .. حلو ويلبق لك ..

مرام : وع لونه فضي.. وين إحنا فيه يمه تبغيني ألبس فضي !

مشاعل للهندي : فيه منه ألوان ثانية ؟!

مرام : حتى لو فيه ألوان ثانية ما عجبني الموديل , مو ستايلي !

مشاعل : تراك جــنــنــتــيني ! هذا و هي ملكة و بالبيت مو لاقية فستان !
أجل بالعرس وش بتسوين ؟!

مرام : بالعرس بـفـصّل , ما بآخذ جاهز .. أنا مزنوقــة بالوقت
وإلا مين بيستقبلني من المشاغل!





/
/








باقي على الملـكة يوم واحد و مرام لحد الآن مو لاقية فستان !

مشاعل : قلت لك خلاص حلفت ما أروح معك السوق جننتيني !

مرام : وبعدين يعني وش ألبس في الملكة !

مشاعل : ألبسي شي من الخلاقين الي عندك الي يشوفك يقول الدولاب فاضي !

مرام : نـعـم ! شوفي يمه لو ما شريت فستان جديد والـلـه أن ما أروح !

مشاعل : بتروحين غـصــب !

مرام : إيه هين ! تراي حلفت زيـيّ زيّك .. ما فيه فستان = ما فيه روحة !


بــدر – أبو عبد المحسن – داخل و بيده ريناد –بنتهم الصغيرة : وشفيكم أصواتكم
واصلة لآخر الشارع !

مشاعل : بنتك ذي بتموتني ناقصة عمر !

بدر : بسم الله عليك وش هالكلام ! بعدين محد يموت ناقص عمر و إذا متّي ترا المقبرة وسيعة..

مشاعل : بسم الله علي منك ما صدقت !

بدر : أنتي الي قلتي ..

و يلتفت لمرام : من الي مزعل بنتي ..

مرام : يبة شف أمي ما بتوديني للسوق تقول ألبسي من الي عندك في الملكة !
ترضى علي يبة قدامهم الكل يصير كاشخ و أنا لابسة فستان ملبوس !

بدر : آفا يا أم عبد المحسن ! وشفيك على البنت خليها تروح السوق و تشتري الي تبي!

مشاعل : والله أني ما قصرت الله يطول بعمري ,بس خلاص رجولي تكسرت من الدوران
مع بنتك ما بقى سوق ما رحنا له , هذي ليلى بنت أخت وش حليلها ما خالفت
و شرت اول فستان عجب أمها !


مرام : والله عاد ليلى ذوقها يختلف عني ..


مشاعل : أجل أقعدي بكيفك ..


مرام : يعني ما بروح للمـلــكة !


مشاعل : إلا بتروحين .. وش اقول لهم إذا قالوا وينها ليش ما جت ؟!


مرام -وهي قايمة- : منيب رايحة مو غصب .. خلاص قولي لهم ما لقت فستان !


مشاعل :هاه سمعت بنتك وشلون ترد علي !


بدر : بعد أنتي الله يهديك , وش الي تلبس شي قديم !



مشاعل : مادامك حانّها أجل ورا ما توديها أنت !


بدر : إيه بوديها !


ريناد : بابا و أنا بتوديني معاكم ؟!


بدر وهو شايلها : إيه يالله مشينا !


مشاعل : أجل أشتروا لريناد صندل فوشي .. لا تنسون ..


يطق الباب على غرفة مرام : يالله يا بنتي أنا و أختك بنسبقك للسيارة لا تتأخرين !


مرام : وين بنروح ؟!


ريناد : ابوي بيودينا السوق ..





/
/






في السيارة ..

أبو عبد المحسن : على وين ؟


مرام : إممم مجمع الموسى الي ورا مكتبة الملك فهد ..

أبو عبد المحسن : إنشالله يا بنتي تلقين هناك الي تبينه ..

مرام : أكيد بلقى صديقتي أنفال تقول إن السوق كله محلات فساتين جاهزة ..



من أول محل دخلته خلاص حست أنها يا تاخذ هالفستان يا ما رح تشتري شي!

* بس هذا هو أبيه !


مرام : وريني هالفستان لو سمحت ..


و يطلعه لها الموظف:مدام فيه عــنــّا منه لونين .. هيدا الأسود .. و فيه منه أحمر كمان


مرام : لا أبغى الأسود


- طيب بشوف لك واحد من جوه إزا سمحتي!


مرام :إمممم لحظة ما سألتك بكم ؟!


- خلينا نشوف المقاس أول مدام , و إزا على السعر مارح نختلف عليه ..


مرام : لا خلينا نشوف السعر أول بعدين المقاس ..


أبو عبد المحسن : يا بنتي وش عليك من السعر ؟ أهم شي الفستان عجبك خوذيه ..


مرام : بس يبـةـ..


أبو عبد المحسن : وأنت ليش واقف يالله جب لنا المقاس ..



و يدخل الموظف المخزن , و يطلع بعد خمس دقايق ..


- أففف منيح الي لقيته هيدا آخر قطعة إنشالله بيكون على مقاسك ..



مرام : طيب وين أقيس ؟!



- في غرف قياس موجودة بالطابق الي فوق .. و حتى بدون ما تدفعي روحي قيسيه
بعدين إزا ناسبك بنتفق على السعر ..


مرام : طيب بكم ؟


- يا مدام قلنا ما رح نختلف على السعر ..


أبو عبد المحسن : يالله يا بنتي خلصينا روحي أنتي و ريناد قيسي الفستان
و أنا بقعد هنا .. عندك جرايد اليوم ؟


- إيه أهلا و سهلا أستاز ..



/
/




في غرفة القياس ..

+ ريناد وش رايك ؟


* حلو يهبلللل , أبغى فستان زيك فستاني مو حلو


" ههههههههه وين أمي تسمعك يوم أني اقولها خليني أشتري لها على ذوقي تعاندني !"
بس رنووود فستانك حلوووو و لونه بنــّاتي يناسب عمرك , شوفي فستاني أسود حق الكبار


* أبي فستان كبار زيك !


+ يووه أنتي راعية طويلة وخري بس لا ألحين أبدأ أعرّق بالفستان , خليني أشوف
شكلي زين ..


" واااااااو الفستان روووعة , أقل شي ينوصف بالروووعة .. شوفي يا بنت كيف مخصر على
جسمك تقولي مفصّل خصيصاً لي أنا ! هو طويل شوي بس ما عليه أخلي الخياطة تقصر
منه ! لا أخاف تروح الحركة الي بالذيل ؟ أهم شي أبيه "


و تشلح الفستان و تدخله بالكيس بشويش .. خلاص صار فستانها ..


ونزلت لأبوها الي كان قاعد يتقهوى مع الموظف و يسولفون عن الأسهم ..

" ههههههه يا حبي لأبوي والله أنه متواضع و اجتماعي ! الله يرزقني بواحد مثلك "


ولما دخلت المحل ..


- شو يا آنسة بنقول مبروك ..


+ إيه طلع مضبوط , يالله بكم الفستان ..

* مو مشكلة السعر يوم أنه مضبوط ..بس عاد راعنا بالسعر يا محمود ترا الأسهم نازلة ههههههههههه


- ههههه ولو حاضرين أستاز .. إممم الفستان بـ 2900 بس كرمالك رح أحسبه بـ 2700ريال !


+ لاااااا كثير ! خليه بـ 2500 ؟!


- ما بيصر مدام ..يا ريت بئدر !


* إلا بتـئدر – على قولك - .. يالله يا محمود إن كانك بتكسب زباين راعنا ..


- إممممم كرمالك أستاز بحسبه 2600 وهيدا أقل شي !


* أقل شي ؟ يالله يا رجال ما بقى على الألفين وخمس إلا مية ..


- طيب كرمال عيونكن 2550 ..


أبو عبد المحسن هو يطلع محفظته .. الله و أكبر يعني إلا الخمسين ..

- معليش أستاز قدر ظروفي والله ما بقدر .. بعدين والله بدّي أكسبكن كزباين ..
بس كمان لازم يربح المحل !!




و تتم العملية .. و تطلع مرام مع أبوها و ريناد للسيارة ..


* يوووه أمك قالت أشتروا جزمة لريناد !


+ إمممم وش رايك يبة توقف عند الفيصلية ؟ تراها على الطريق !

* تبغين شي بعد؟


+ إيه الله يعافيك خاطري بإكسسوارات وشنطة و جزمة !


* ههههههههه كل ذا ! أنا قلت شي مو أشياء !


+ والله أنت كريم و إحنا نستاهل !




/
/













بعد ما خلصوا من الـ Shopping .. أبو عبد المحسن عزم البنات على مطعم ..



وهم ينتظرون العشا ..

+ هاه يبة ما رح نسافر هالسنة ..



- إلا إنشالله بس ربك يسهلها ..



+ وين بنروح ؟!



- أنتوا وش تبغون ؟ أمك تبي سوريا !



+ لا عاد موب حلى سوريا ! أولــة العام كنا فيها وما أنبسطت مرة !



+ أجل وين تبغون ؟



- أنا أقول خل نروح مكان جديد ؟ خل نروح نيو زيلاندا !



+ الله نيوزيلاندا مرة وحدة !



- إيه يبه والي يسلمك ..



+ لا لا لو بنروح مكان بعيد رحنا لوس انجلوس و إلا فلوريدا ! بس أنا ما أتحمل
السفر بالطيارة لمكان بعيد ! خصوصاً إذا معنا بزران !



* أنا موب بزر !




+ بسم الله علي و أنتي حاطة إذنك معنا !



* إيه بابا وش قالوا لك ما أفهم ؟!



+ إلا تفهمين ماشالله عليك .. و إنشالله السنة الجاية بتدخلين الروضة ..



* مابي أبغى انوم بالبيت زي مرام .



- الله صرت قدوة حسنة لبنتكم في النوم بس !



+ ههههههه ماشالله عليك كم تنومين من ساعة في اليوم ؟



- تأخر الطلب .. قل لهم وين العشا ؟



+ ههههههه صرّفي و أنا ابوك .. بس إنشالله أول ما نرجع من السفر بسجلك في معهد
تاخذين دبلوم أفيد لك من السهر و النوم ..



- لا يبة ما أبغى دبلوم .. إذا تبي تدبرني دور لي وظيفة !



+ ما لقوا وظايف للرجال يلاقون لكم وظايف .. على العموم عطيني أوراقك بكرة ..
و أعطيها لعمك اسم أنه يشتغل في الديوان ..



- تتوقع عاد فيه وظايف !



+ هو مواعدني و قايل لو نزل لك علي أسجل مرام .. تراه يعدك مثل بنته و أغلى ..



- و يعلم ربي أني أعده مثلك , بس أنت اغلى ..



+ هههههههههه ما دمتي تعرفين تقولين كلام حلو , ورا ما تعلمين أمك ؟!




* أمي كلامها حلو !



+ وأتي يالسوسة حاطه أذنك معنا ..

اقوول مو كأن العشا تأخر !







/
/





رجعت البيت و راحت لغرفتها على طوول ..

أمها تطق الباب عليها .. وريني بسررعة ..


لحظة يمة خليني آخذ شاور ما رح ألبسه و أنا كذا بخياسي !


مشاعل : يوووووه , أنا بروح اكلم أختي بشوف وش يحتاجون ناخذ لهم بكرة
وإذا لبستي تعالي وريني !




مرام طلعت من الحمام و هي مبسوووطة.. الحمد لله بررركة الي رحت مع أبوي !


و طلعته من الغلاف , و قعدت تتأمل فيه..


"صحيح شكله ناعم و بسيط بس كلاسيك.. قماشه ساتان على الموضة يعني بصير ستايل!!

يبغى لي أسرح شعري Weavy .. أخاف أقصه و ما يبقى فيه شي يتسرح !بخلي القص بعدين "



و بدت تلبسه و لبست معاه عقد شانيل الألماس – هدية ابوها بمناسبة تخرجها –

و لبست الجزمة معاه و نزلت شعرها بعد ما سوت له تجفيف عالسريع و راحت للمراية..




و فجأة و هي تتأمل نفسها سمعت الباب يطق ..


+ مين ؟


- مرام يالله بابا يقول وينك ما وريتيه الفستان !


+ يا حبي لأبوي ..






و نزلت مع الدرج .. أبوها الي كان يقرا الجريدة سمع خطوات الكعب و رفع راسه يطالعها ..

و أمها الي كانت تكلم أختها سكتت فجأة .. أقول يا أختي بكلمك بعدين ..


مشاعل : الله الله وش هالزين ! يا جعلي شوفك كاشخة عروس !



مرام الي كانت تنزل وإبتسامتها شاقة الوجه , عبست فجأة .. و وقفت بنص الدرج..



بدر – أبو عبد المحسن - :مشالله الله يحفظك و يخليك لعين ترجيك ..إيه هذي بنت ابوها



مشاعل: انزلي خليني أشوفه زين ..


و كملت نزول ..


مشاعل : يا سلام لو أدري أنك بتشترين هالزين كان خليت أبوك يوديك من زمان ..
إلا ما قلتي لي بكم ؟



مرام : كم تعطينه ؟


مشاعل : إمممم من 600 إلى 800 ريال !



مرام -أنصدمت - : حرام عليك يمة !


مشاعل -الي أنصدمت - : أجل بكم أخذتيه



مرام توها بتقول السعر بس أنتبهت ابوها يغمز لها ..



بدر : بـ 1500 ريال !



مشاعل : هااااااااااااااااااو و الله أنلعب عليكم ؟



بدر : وش هالكلام ؟



مشاعل تقوم و تطالع القماش : شوفوا هذا ساتان متره عند أبو عشرة ..
وهذا الذيل الي ورا كله دانتيل و كلفة و قماشهم مو ذاك الزود و ..



بدر : اقول خلاص البنت عاجبها الفستان وهذا أهم شي ..



مشاعل : بلاني ما رحت معكم وإلا لو أني رايحة كان خذناه بــ 600 ريال و تـخـب!


مرام لا شعورياً دمــعــت عيونــهــا ..


وراحت تركض بالدرج .. صدمت في عبد المحسن ..


عبد المحسن : الله وش هالكشخة وش هالزين لا لا ما اصدق الحلوة هذي أختي !!


مرام : عبد المحسن بـعّد شوي لو سمحت ..


و طلعت فوق بدون ما تخليه يــكــمــل !



عبد المحسن ينزل .. وشفيها مرام ..



بدر : أمك ما تقصر , بس نازلة في البنت تحطيم !



مشاعل : وأنا وش قلت ! بعدين أنت وشلون تطاوعها و تدفع في الفستان هالقيمة ..



بدر : هم شي عندي شوفة بنتي مستانسة ! ويقوم بعصبية ..



عبد المحسن : وش السالفة يمه !



مشاعل : ابوك وأختك شروا ذا الفستان الي عليها بـ 1500 !


عبد المحسن : طيب وشفيها !



مشاعل : والله ما يستاهل أنا أول ما شفته عطيته 500 ريال بس !



بدر -رجع يوم سمعها تعيد السالفة - : و ما دمتي تفهمين بذا الأشياء ليش ما وديتيها أنتي هاه ؟



مشاعل : والله لو أدري أنكم بتشترون ذا الخلقة وتدفعون 1500 كان رحت أنا !



بدر : أنتي الحكي معك ضايع ..







/
/














دخلت غرفتها و شلحت الفستان و رمته على السرير ..


وجلست على الكرسي الهزاز تبكي


ليش أمي تعاملني كذا!

هذا و أبوي ما علمها السعر الحقيقي !

أجل لو عرفت أنه بـ 2500 وش سوت !

كان خلتني أرجعه !


آآآآه يا ربي أنا متى برتاح من هالحياة !




و سمعت صوت الباب .. مين ؟!



_ أنا أبوك..


+ يبه أنا بنام ألحين ..


- أجل نامي بحفظ الله .. ,اقري الأذكار يا بنتي و لا تشيلين بخاطرك ..


+ مشكور يبه أنا ما زعلت تصبح على خير ..


- و أنتي من أهله ..




أنام ! من وين يجي النوم !

خلني أروح للنت من جت ملكة مضاوي و أنا ما عاد شيّــكت على إيميلي ..



راحت تفتح اللاب توب .. و دخلت الحمام تغسل وجهها ..

رجعت تشبك الاتصال و فتحت المسنجر و سوت تسجيل دخول ..


"المتصلين 4 بس !

إمممم هذي مبلكتها ..

و هذي بــثــرة !

وهذي مدري مين ؟!


إمممم يالله خلني أسولف مع أنفال .. مع أني من زمان عنها .."



Never Worry Allah Is Always With You :
سلامـ



عيونــك صــوبــت قــلــبــي .. و ســهــم الــعــيــن مـا يـرحـم :
وعليكم السلامـ



Never Worry Allah Is Always With You :
كيفك يا عــســل ..



عيونــك صــوبــت قــلــبــي .. و ســهــم الــعــيــن مـا يـرحـم :
تمام يا بــصــل



Never Worry Allah Is Always With You :
آفاااااااا وش هالحتسي !



عيونــك صــوبــت قــلــبــي .. و ســهــم الــعــيــن مـا يـرحـم :
وينتس فيه يالقاطعة ! من زماااان عنتس لا مسنجر و لا مسجات و لاشي !
يختي إذا فاتورتك ما تسمح فيه خدمة جديدة سوتها الاتصالات$$
"Plz call Me "



.. وبهاللحظة أرسلت مرام لأنفال مسج ..



عيونــك صــوبــت قــلــبــي .. و ســهــم الــعــيــن مـا يـرحـم :
يالبخيلة ! يا قليلة الخاتمة .. ما صدقتي !!



Never Worry Allah Is Always With You :
هههههههههههه يالله خليك قد كلمتك و دقي ..






و تدق أنفال على مرام ..



+ يالله عطيني تقرير مفصل من يوم ودعتك آخر مرة في بيت عبير إلى هاللحظة ..



- أبد الله يسلمك ..لا جديد .. مضاوي بنت خالتي بتعرس !



+ مضاويييييي أخت راكااااااااااااااااااااااااااااااااااااااااااااااا ااان !


- يمه منك وشلون عرفتي أن عندها أخو و اسمه راكان !


+ يالحقيرة نسيتي أول ما تعرفنا على بعض قلت لك عندك أخوان !
قلتي لا بس عندي خال .. عاد ما انسى صدمتي يوم تزوج خالك فيصل ..
إلا الله يسامحه وشخباره



- ههههههههههه طيب ما عليه و حرمته حامل ..



+ هب بهالسرعة !


- هبت عليك رياح تشيلك إنشالله وجععععع بعدين تراهم متزوجين من 6 شهور !



+ هههههههه يا حليلك أتذكرك وأنتي مزعجتنا يوم تقولين دوروا لي فستان ..
و أقولك أسمعي كلامي يالبقرة مالك إلا الجاهز و أنتي مسوية فيها تبغين تفصيل !


- ههههههههههه الله يعافيك أنتي عارفة اليوم أنك انقذتيني !



+ أكيد أنتي مدري وش تسوين بدوني في الحياة !وشلون انقذتك ؟



-أنتي عارفة ملكة مضاوي بكرة ,و صار لي أسبوعين أدور ما لقيت فستان جاهز ,
عاد تذكرتك يوم تمدحين لي مجمع الموسى رحت اليوم مع أبوي و شريت واحد ..



+ وش أخباره عمو



- هي أنتي بتخطفين رجال العايلة كلهم !



+ لا أنا مابي إلا راكان ..



- و ليش راكان بالذات ؟!




+ قلت لك أنك حقيرة بس أنتي ما تسميعن ! بعد ملكة فيصل خالك ..
و بعد الانهيار العصبي الي جاني أنتي وعدتيني أنك تزوجيني إياه بما أنه
أقرب واحد للعرس في عايلتكم ! إلا تعالي لا يكون ناوي يعرس و يخليني !



- وش دراني عنه ! يوم الي بيعرس برسل لك البطاقات مع كارد مني مكتوب :
Hard Luck My Dear With The Next Guy In Our Family




+ وجععععععع و أنا بس غرضي أتفرج على شبابكم يضيعون من بين يديني واحد
ورا الثاني .. خلاص زوجيني أبوتس




- بسم الله على ابوي ! تبين يجيه جلطة منتس !




+ وجعتين .. وش قالوا لتس عني بكت سجاير !




- لا شيشة !



+ هههههههههه بايخة



- مثلك





و تسمع مرام صوت تسجيل دخول .. يووووه أنا ما طفيت الجهاز ..


+ طيب أوصفي لي الفستان ..




- لحظة شوي بس ..



و تقرب للجهاز .. كان المتصل راكان .. و دخل معها بمحادثة ..


* يوووه تونا بسيرتك !!






بــحياتك يا ولدي امرأة عيناها سبحان المعبود ..
السلام عليكم



و تغير الحالة إلى مشغول ..


Never Worry Allah Is Always With You :
وعليكم السلام .. راكان انا مشغولة شوي ..



بــحياتك يا ولدي امرأة عيناها سبحان المعبود ..
براحتك .. بس كنت بسأل وينك .. من زمااان عنك على بالي أني مسوي شي
يستاهل البلوك !



Never Worry Allah Is Always With You :
شوف معاي مكالمة اخلصها و ارجع أوكي



بــحياتك يا ولدي امرأة عيناها سبحان المعبود ..
Take Your Time






/
/




+ ايوه ..




- وجع وين رحتي على بالي رحتي الحمام و رجعتي !




+لا بس طلعت ناسية المسنجر مفتوح والحالة أون لاين .. فطلع لي ..
وحدة من البنات القدام صرفتها و جيت



- من هي ؟



+ وحدة متعرفة عليها من منتدى..



- آهه طيب وصفي الفستان ..



وجلست مرام تسولف مع أنفال و نست المسنجر ..




بــحياتك يا ولدي امرأة عيناها سبحان المعبود ..
مرام أنا ضروري أطلع ألحين ..




* يوووه نسيته !!



Never Worry Allah Is Always With You :
أوكي



بــحياتك يا ولدي امرأة عيناها سبحان المعبود ..
مع السلامة




Never Worry Allah Is Always With You :
مع السلامة ..





ويطفي راكان اللاب توب ..



" هذي وشفيها ! صار لها أسبوعين و زيادة ما تدخل مسنجر معي !
من يوم ما رجعنا من المزرعة و هي ..



لحظة لا تكون زعلت يوم سالفة المقبرة !


والله عاد قلعتها أنا كان قصدي أغير الجو لهم ..

و الله أني غبي مزعل نفسي عشان وحدة ما تستاهل !!

آآآه يالله بس الله يخلص ملكة مضاوي على خير .. و أمي تخطب لي شروق بنت عمي
و هالمغرورة أنا الي ببلكها و بحذفها بعد !! "




يــتــبــع

يالله يمديكم على الدلع دلعتكم نزلت ثلاثة اجزاء اليوم وبحاول بكرة انزل بعد جزء لاني الخميس والجمعة اوووب داخلة يعني جزؤها بين اليوم وبكرة والخميس والجمعه


وناقشوا الاحداث اللي صارت وعطوني ارئكم على الاجزاء انتظركم على احر من الثلج

خسااره كنت اعتقد
راكان يغير رايه ويخطب مرام
الله يعينها مرام بصراحة حزنتني


يسلمووو يالغلا

بالانتظار....